کیلیفورنیا: ٹیکنالوجی ویب سائٹ کی رپورٹ کے مطابق، اوپن اے آئی نے چیٹ جی پی ٹی میں ایک جدید حفاظتی نظام اور والدین کے لیے کنٹرولز متعارف کروا دیے ہیں تاکہ بچوں اور نوجوانوں کو ذہنی دباؤ اور خودکشی جیسے خطرات سے بچایا جا سکے۔
اس نئے نظام میں چیٹ جی پی ٹی بات چیت کے دوران جذباتی حساسیت کو پہچان کر خودکار طور پر بات چیت کو جی پی ٹی-5 ماڈل کی طرف منتقل کر دیتا ہے، جو حساس سوالات کے محفوظ اور مناسب جوابات دے سکتا ہے، بجائے اس کے کہ بات چیت سے انکار کرے۔
والدین کے لیے خصوصی کنٹرولز بھی شامل کیے گئے ہیں، جس کی بدولت والدین اپنے بچوں کے چیٹ جی پی ٹی اکاؤنٹس کو اپنے اکاؤنٹس سے جوڑ کر نگرانی کر سکتے ہیں۔ اگر بچوں کی بات چیت میں کوئی حساس یا خطرناک موضوع سامنے آئے تو والدین کو فوری نوٹیفکیشن بھیجا جائے گا تاکہ وہ بروقت مداخلت کر سکیں۔
اوپن اے آئی نے اس حفاظتی نظام کی آزمائش کا آغاز کر دیا ہے اور اسے مزید بہتر بنانے کے لیے 120 دن کا وقت مقرر کیا ہے۔ کمپنی کا کہنا ہے کہ صارفین کی رائے کی بنیاد پر اس نظام کو بہتر اور مؤثر بنایا جائے گا۔
یہ اقدام ایسے واقعات کے بعد اٹھایا گیا ہے جن میں نوجوانوں نے چیٹ جی پی ٹی کے ساتھ بات چیت کے بعد خودکشی کی کوششیں کیں یا ذہنی دباؤ کا شکار ہوئے۔ اوپن اے آئی کا مقصد ہے کہ بچے اور نوجوان چیٹ جی پی ٹی کو محفوظ طریقے سے استعمال کریں اور غیر مناسب مواد یا بات چیت سے بچ سکیں۔
