لاہور/کولمبو : ٹی ٹوئنٹی ورلڈ کپ کے سب سے بڑے ٹاکرے کے لیے میدان سجنے سے قبل ہی انتظامی محاذ پر سرگرمیاں عروج پر پہنچ گئی ہیں۔ چیئرمین پاکستان کرکٹ بورڈ محسن نقوی کے ہنگامی دورہ سری لنکا کے امکانات نے کرکٹ حلقوں کی توجہ کولمبو کی جانب مبذول کرا دی ہے۔
ذرائع کے مطابق، محسن نقوی کولمبو پہنچ کر قومی کرکٹ ٹیم کے کھلاڑیوں اور آفیشلز سے خصوصی ملاقات کریں گے۔ اس ملاقات کا مقصد اہم میچ سے قبل کھلاڑیوں کے مورال کو بلند کرنا اور انہیں پی سی بی کی مکمل حمایت کا یقین دلانا ہے۔ ماہرین اسے بڑے مقابلے سے قبل "ون ٹو ون” سیشن قرار دے رہے ہیں۔
کولمبو میں صرف پاکستانی قیادت ہی نہیں بلکہ خطے کے دیگر کرکٹ بورڈز کے سربراہان بھی جمع ہو رہے ہیں۔ بنگلادیش کرکٹ بورڈ (BCB): صدر امین الاسلام کی آمد بھی طے پا چکی ہے۔
کونسل کے دیگر اہم اراکین بھی کولمبو پہنچ رہے ہیں، جس سے یہ دورہ محض ایک میچ کی تیاری نہیں بلکہ ایک بڑی بیٹھک کی صورت اختیار کر رہا ہے۔
کرکٹ ذرائع کا کہنا ہے کہ ورلڈ کپ کے بڑے میچ کے پسِ پردہ ایشیائی کرکٹ کونسل کے اراکین کے درمیان مستقبل کے ایونٹس اور باہمی تعاون پر بھی مشاورت کا امکان ہے۔ کولمبو میں ان اہم شخصیات کی موجودگی کرکٹ کے بڑے ٹاکرے کے سسپنس کو مزید بڑھا رہی ہے۔ ٹی ٹوئنٹی ورلڈ کپ کے بڑے معرکے کی تیاریاں حتمی مرحلے میں داخل ہیں۔ چیئرمین پی سی بی محسن نقوی کولمبو میں ٹیم کا جوش بڑھائیں گے۔ بنگلادیش کرکٹ بورڈ کے صدر امین الاسلام بھی کولمبو پہنچیں گے۔
