کیلیفورنیا: انسٹاگرام نے اپنے صارفین کے لیے ایک نیا فیچر متعارف کرایا ہے جس کا مقصد ریلز ویڈیوز کو دوبارہ تلاش کرنا اور ان تک رسائی حاصل کرنا آسان بنانا ہے۔ اس فیچر کا نام "واچ ہسٹری” رکھا گیا ہے، اور یہ فیچر صارفین کو وہ ویڈیوز دوبارہ دیکھنے کا موقع فراہم کرے گا جو وہ پہلے دیکھ چکے ہیں، مگر کسی وجہ سے اب وہ دستیاب نہیں ہیں۔
انسٹاگرام کے سربراہ ایڈم موسیری نے اس فیچر کا اعلان کرتے ہوئے کہا کہ صارفین کی سہولت کے لیے یہ نیا فیچر بنایا گیا ہے تاکہ وہ اپنی دیکھی ہوئی ویڈیوز دوبارہ تلاش کر سکیں، چاہے وہ سکرولنگ کرتے ہوئے غلطی سے گزر گئی ہوں یا ایپ کا ریفریش ہونے کی وجہ سے غائب ہو گئی ہوں۔
"واچ ہسٹری” فیچر کا استعمال نہایت آسان ہے۔ صارفین کو صرف انسٹاگرام ایپ میں جا کر سیٹنگز میں "Your Activity” کا آپشن منتخب کرنا ہوگا، پھر "Watch History” پر کلک کریں۔ یہاں آپ کو حالیہ دیکھی ہوئی ریلز ویڈیوز سب سے اوپر ملیں گی اور نیچے آپ پرانی ویڈیوز تک بھی رسائی حاصل کر سکیں گے۔ اس کے علاوہ، صارفین کسی خاص تاریخ کو منتخب کر کے اس دن دیکھی جانے والی ویڈیوز بھی دیکھ سکتے ہیں۔
یہ فیچر خاص طور پر ان لوگوں کے لیے مفید ہے جو ریلز ویڈیوز دیکھنے کے شوقین ہیں اور اکثر ویڈیوز کو کسی وجہ سے دوبارہ تلاش کرنے میں مشکل محسوس کرتے ہیں۔
انسٹاگرام کا یہ نیا فیچر صارفین کو بہتر تجربہ فراہم کرنے کی ایک اور کوشش ہے، اور یہ امکان ہے کہ مستقبل میں اس میں مزید فیچرز بھی متعارف کرائے جائیں گے.
