اینٹیگا: آئی سی سی ٹی ٹوئنٹی ورلڈ کپ کے سپر ایٹ مرحلے میں سنسنی خیز مقابلوں کا سلسلہ جاری ہے۔ گروپ ون کی دو اہم ٹیمیں، ویسٹ انڈیز اور زمبابوے، آج ایک دوسرے کے خلاف میدان میں اتریں گی۔مقامی وقت کے مطابق یہ اہم مقابلہ شام ساڑھے 6 بجے شروع ہوگا۔ ویسٹ انڈیز کو ہوم گراؤنڈ اور کراؤڈ کی حمایت حاصل ہے، جبکہ زمبابوے کی ٹیم ٹورنامنٹ میں اپنی فتوحات کا سلسلہ برقرار رکھنے کے لیے پرعزم ہے۔ دونوں ٹیموں کے لیے یہ میچ سیمی فائنل کی دوڑ میں شامل رہنے کے لیے کلیدی اہمیت کا حامل ہے۔
دوسری جانب، پاکستانی کرکٹ شائقین کی نظریں کل ہونے والے بڑے مقابلے پر جمی ہوئی ہیں۔ پاکستان سپر ایٹ مرحلے میں اپنا دوسرا میچ انگلینڈ کے خلاف کھیلے گا۔ پہلے میچ کے نتائج کے بعد، کل کا مقابلہ گرین شرٹس کے لیے "کرو یا مرو” کی صورتحال اختیار کر چکا ہے۔ قومی ٹیم نے انگلینڈ کی مضبوط بیٹنگ لائن کو قابو کرنے کے لیے خصوصی پلان تیار کر لیا ہے۔
